මලයාලි මන්ත්‍ර ශාස්ත්‍රය.

මලයාලි මන්ත්‍ර ශාස්ත්‍රය.
මලයාලි මන්ත්‍ර ශාස්ත්‍රය ලෝකයේ ප්‍රබලම මන්ත්‍ර ශාස්ත්‍රයයි . මලයාලි මන්ත්‍ර ශාස්ත්‍රයේ වැදගත්ම අංගය වන්නේ සිද්ධි ලබාගැනීමයි . කාලි ,ගණපති ,මාඩ ශාමි ,භගවතී ආදී සිද්ධි ලබාගැනීමෙන් තොරව මලයාලි ගුරුකම් කල නොහැක .මලයාලි මන්ත්‍ර ශාස්ත්‍රය සම්බන්ධයෙන් මා ජ්‍යොතිෂ පුවත්පතකට ලිපි මාලාවක් ලියු අතර ඊට මහත් ජනතා ප්‍රතිචාර ලැබුණි .එම ලිපි මාලාව තුලින් මා හෙළි කළේ මාගේ මුත්තා විසින් කරන ලද විස්මිත ගුරුකම් ගැනය . මාගේ මුත්තා මලයාලි මන්තර ශාස්ත්‍රය ඉගෙනගෙන ඇත්තේ "වේණු ශාමි" නම් කේරළ මන්ත්‍රාචාර්යවරයෙක් ගෙනි . අද බොහෝ දෙනෙක් "මලයාලි ගුරුකම්" කරන බව පැවසුවද ඔවුන් මලයාලි මන්ත්‍ර ශාස්ත්‍රයේ මුලික අංග වත් නොදනී. වරු තුනෙන්, දින තුනෙන් වශී ගුරුකම් කරන බව පවසමින් පුවත්පත් වල පලකරන දැන්වීම් ප්‍රමාණය සුළුපටු නොවේ. කෙනෙක් වෙත කෙනෙක්ගේ සිත ගිය පමණින් වශිකරගැනීමට හැකිනම් ලෝකයේ ඕනෑම කෙනෙක්ව ඕනෑම කෙනෙකුට වශී කරගැනීමට හැකිය. මලයාලි මන්ත්‍ර ශාස්ත්‍රය තුළ වශී ගුරුකම් සම්බන්ධයෙන් අනුගමනය කළ යුතු විශේෂ විධි,ක්‍රම පවතී. මලයාලි මන්ත්‍ර ශාස්ත්‍රය ගැන සියලු විස්තර ,තොරතුරු නිවැරදිව හෙළිකර දෙමින්, පුර්ණ අවබෝධයක් ඔබට ලබාදීමට මම අදහස් කළෙමි. මෙතැන් පටන් පලවන සියලු විස්තර කියවා දැනුම අවබෝධය ලබාගන්නා ලෙසත් , ව්‍යාජ මන්ත්‍ර කරුවන්ට නොරැවටී සිටින ලෙසත් ඉල්ලා සිටිමි.

Friday, June 4, 2021

 


වරමක් තියෙන එක්කෙනෙක් හරි හැම ගමකම ඉන්නවා. සමහර ගම්වල දෙතුන් දෙනෙක් ඉන්නත් පුළුවන්. මේ හැමෝටම තියෙන්නෙ නිකම් වරම් නෙමෙයි. ඒවට කියන්නෙ "දේව වරම්" කියලා. දෙවියො ඇඟට ඇවිත් අඩි හප්පලා, ඔලුව කරකවලා, අඩව්වක් අල්ලලා සාස්තර කියන්න පටන්ගන්නවා. සමහරුන්ට වරම ඇඟට එන්න බෙරයක් ගහන්න ඕනැ. සමහරු කවි කියල වරම ගන්නවා. ගොඩක් දෙනෙක්ගෙ වරම ආවට පස්සෙ දකින්න ලැබෙන පොදු ලක්ෂණය තමයි දැඟලිල්ල. දෙවියන්ට එක විදියකට ඉන්න බැරිද කියලත් සමහරු හිතනවා ඇති. කොයි හැටි වෙතත් මේ හදන්නෙ වරම් හිමියන් උපහාසයට අපහාසයට ලක් කරන්න නෙමෙයි කියන එකත් කියන්න ඕනැ. වරම් ගැන සාකච්ඡාවට බඳුන් වෙනවා හරි අඩුයි. ඉඳ හිට කවුරු හරි අදහසක් ඉදිරිපත් කළත් ඇත්ත තත්වය හරියට විස්තර වෙන්නෙ නෑ. අන්න ඒ හින්දා වරම් ගැන විස්තරය මේ විදියට ලියන්න හිතුවා. 

ඇත්තටම මේ වරම් කියන්නෙ දෙවියන්ගෙ වරම්ද ?

ඒ ප්‍රශ්නෙට උත්තර දෙන්න කලින් දෙවියො ගැනත් ටිකක් කතා කරන්න වෙනවා. මොකද දෙවිවරුත් එක එක විදියෙ අය ඉන්නවනෙ. අල්පේශාක්‍ය දෙවිවරු ඉන්නවා මහේශාක්‍ය දෙවිවරු ඉන්නවා. දෙවියෙක්ද යක්ෂයෙක්ද කියල හරියට තේරුම් ගන්න අමාරු අයත් ඉන්නවා. සමහර දේවතාවියො ඉන්නවා දිව එළියෙ  කඩුව අතේ. ඇඳුම් නෑ.  පෙනුම දරුණුයි. දාමරික වැඩවලටම තමයි සම්බන්ධ වෙන්නෙ. රටේ කුමන හෝ පළාතක ජීවත් වෙලා අභාවයෙන් පස්සෙ කාලයාගේ ඇවෑමෙන් දේවත්වයට පත් වුණු අයත් ඉන්නවා. කඩවර දෙවියො, රන්වල දෙවියො, මහසෙන් දෙවියො, කතරගම දෙවියො, සමන් දෙවියො වගේ දෙවිවරු තමයි ඒ. මේ අය නිකම් ජීවිත ගත කරලා දේවත්වයට පත් වුණු අය නෙමෙයි. කුමන ආකාරයකින් හෝ යම් ශ්‍රේෂ්ඨතත්වයක් වීරත්වයක් ඇතුව ජීවත් වෙලා තමයි දේවත්වයට පත් වෙන්නෙ. ඒක කාලයත් එක්ක බොහෝ දෙනෙකුට දැනිලා, පෙනිලා, පිහිට ලැබිලා සිද්ද වෙන දෙයක්.  මැරෙන හැමෝම දේවත්වයට පත් වෙන්නෙ නෑ. "ඊයෙ හවස මම දැක්කනෙ මැරිච්චි අබරං ගොයියා පන්සල හන්දියෙ ඉන්නවා" කියල කවුරු හරි කිව්වට ගමේ මිනිස්සු අබරං ට පහන් තියාගෙන පිහිට ඉල්ලන්න යන්නෙ නෑ. ඒකට මහා පින් බලයක් තියෙන්න ඕනැ.


අපි දන්න, විශ්වාස කරන දේව ලෝක හයක් තියෙනවා. ඒ තමයි චාතුර්මහා රාජිකය, තාවතිංසය, යාමය, තුසිතය, නිර්මාණරතිය,පරනිර්මිත වසවර්තිය කියන දේව තල හය. චාතුර්මහා රාජිකය කියන්නෙ හතර දෙනෙක් පාලනය කරනව කියන එකනෙ. මේකෙ කොටස් හතරක් තියෙනවා. මේ කොටස් හෙවත් රාජ්‍යයන් හතර සතරවරම් දෙවිවරු පාලනය කරනවා.මේකෙ අධිපතියා තමයි ශක්‍ර දේවේන්ද්‍රයා. " ශක්‍ර දේව වරමින් සාස්තර කියනු ලැබේ" කියල කවුරුවත් බෝඩ් එකක් දාගෙන ඉනවද ? නෑ. මේ දේව ලෝක හයේ ඉන්න කිසිම දෙවි කෙනෙක්ගෙ වරමකින් සාස්තර කියන අය නෑ. වරමින් සාස්තර කියන අය භාවිතා කරන දේව නාම කීපයක් වෙනම තියෙනවා.


වරම්ලාභින් නොයෙක් ගැටලුවලට මුහුණ දෙන අවස්ථාත් තියෙනවා. සමහරු මටත් කතා කරන අවස්ථා තියෙනවා. "මගෙ වරම කවුරු හරි හිර කරලා...ඒක ආපහු හදල දෙන්න පුලුවන්ද..." මගෙ ඥාතියා ඇඟට එන්නෙ නෑ..." " ඥාතියා බන්ධනයකට අහුවෙලා. බන්ධනය කපලා ඥාතියා නිදහස් කරලා දෙන්න පුලුවන්ද...." ඔන්න ඔය විදියෙ ඉල්ලීම් ඉදිරිපත් වෙනවා.  දෙවියො හිරවෙලා කියල කවුරුවත් කියන්නෙ නෑ. දෙවියො එන්නෙ නෑ ගෙන්නලා දෙන්න කියල ඉල්ලන්නෙත් නෑ. එහෙම නම් වරම දේව වරමක් කිව්වට ඇත්තටම වරම ඥාති ප්‍රේතයෙක්ගෙනෙ. 


විවධ ගති ලක්ෂණ තියෙන අය ප්‍රේතයො අතරෙත් ඉන්නවා. වරම්වලට එන ප්‍රේතයො අතරෙත් එහෙම තමයි. සමහරු ඇත්ත කියන ගමන් බොරුත් කියනවා. පින් බලාපොරොත්තුවෙන් වරම් ලබා දෙන ප්‍රේතයොත් ඉන්නවා. මනුස්සයින්ට උපකාර කරලා සීමිත කාලයකින් මිදිලා යන්න තමයි ඒ අය එන්නෙ. එහෙම යහපත් චේතනාවෙන් ආවට සාස්තර කියන කෙනා හිතු මනාපෙට මුදල් පස්සෙ යන්න ගියොත් ඥාතියා ඉක්මනටම යන්න යනවා. ඒ වගේ ඥාතීන් එක්ක ප්‍රතිපත්ති ගරුකව කටයුතු කරන්න ඕනැ. බොහොම පිරිසිදුවට ඉන්න ඕනැ. එහෙම ප්‍රේතයො බොහෝ වෙලාවට වරම් දෙන්නෙත් පිරිසිදු ගුණයහපත් සංවර අයටයි.  වැඩිපුර දකින්න ලැබෙන්නෙ බොහොම පහත් වරම්නෙ. ඒ හැටි දැන උගත්කමක්, පිරිසිදුකමක්, කාරුණික බවක්, සංවර හැසිරීමක් නැති අය වරමින් සාස්තර කියනවා. ගෙදර දොර, ගේ වටපිටාවවත් පිළිවෙලට පිරිසිදුව නෑ. ඒ කෙනාගෙ හැටියට තමයි වරම. වරම ඇඟට ආපු වෙලාවෙ ඉඳලා කරන්න හදන්නෙත් පවුල් කඩාකප්පල් කරන,මිනී මරණ, එකතැන් කරන වැඩනෙ. ඉතින් ඇඟේ ඉන්න ප්‍රේතයා ගැන හිතාගන්න පුළුවන්නෙ.


 වරම් දීලා ඒ වරමෙන්ම නැත්තටම නැති කරන ප්‍රේතයොත් ඉන්නවා. සාස්තර කියන එකත් නැවතිලා, වටේ පිටේ ඉන්න අයත් තරහ වෙලා, සියල්ල අහිමි වුණු අය ඉන්නවා. සාංසාරික වෛරක්කාරයො විවිධ ස්වරූපවලින් එනවා. බිරිඳ විදියට ස්වාමිපුරුෂයා විදියට, දරුවෙක් විදියට, පෙම්වතා හෝ පෙම්වතිය විදියට වෛරක්කාරයො එන අවස්ථා තියෙනවනෙ. අමනුස්සයො විදියටත් වෛරක්කාරයො එන්න පුළුවන්. උදව් කරන්න කියල තමයි එන්නෙ. ඇවිත් සියල්ල විනාශ කරන එක තමයි කරන්නෙ. මම දන්න කෙනෙක් ඒ විදියට අමාරුවෙ වැටුණා. වරම ලැබුණු මුල් කාලයේ පුදුම සෙනඟක් ආවා. සෑහෙන මුදලක් හම්බ කළා.  මෙයා ටිකෙන් ටික බිමට ඇබ්බැහි වුණා. දේවාලෙට සෙනඟ එන එක නැවතුණා. වරම හිටි හැටියෙ අතුරුදන් වුණා. 


ඇඟට ආරූඩ නොවී පැත්තකට වෙලා අවශ්‍ය දේ කියන ප්‍රේතයොත් ඉන්නවා. ඒ අයගෙ කිසිම දැඟලිල්ලක් නෑ. කොහොම කියනවද කියල කාටවත් හොයාගන්නත් බෑ. දුරබැහැර පළාතක ජීවත් වෙන හොඳටම වයස ගැහැණු කෙනෙක් ඔය විදියට සාස්තර කියනවා. එක කාන්තාවක් ගිහින් සාස්තරයක් අහනවා. " උඹට ඒකා අන්තිමට කතා කරපු වෙලාවෙ ගෑණියෙක් කතා කරන සද්දෙ ඇහුණා නේද...උඹට සැකේකුත් ඇති වුණා නේද...ඒ ගෑණිත් එක්ක තමයි දැන් ඌ ඒ රටේ ජීවත් වෙන්නෙ...උඹලා ගැන දැන් වැඩිය බලන්නෙ කරන්නෙ නෑනෙ...උඹටයි දරුවටයි මිල මුදල්වත් එවන්නෙ නෑනෙ..." රට රස්සාව කරන තමන්ගෙ මනුස්සයා ගැන අහන්න ගිය කාන්තාවට ඔය විදියේ විස්තරයක් බලාගෙන හිටියා වගේ කිව්වා. සාස්තර කියන මේ ආච්චි අම්මා කකුල් දෙක ළඟට දිග ගවුමක් ඇඳගෙන බොහොම සන්සුන්ව පුටුවක වාඩිවෙලා කිසිම කලබලයක් නැතුව තමයි කියන්නෙ. 


ප්‍රේතයො බලෙන් අල්ලාගෙන සාස්තර කියන අයත් ඉන්නවා. ඥාති ප්‍රේතයෙක් කැමැත්තෙන් වරමක් දෙනවා වගේ නෙමෙයි මේක. ප්‍රේතයෙක්ව හිර කරගෙන වැඩ ගන්න එක ටිකක් බයානකයි. ලැබුණු සැණින් මිදිලා මහ විනාශයක් කරන්න පුළුවන්. එහෙම කරදරවලට මුහුණ දුන් අයත් ඉන්නවා. 


වරම් විදියට හැදෙන මානසික අසනීපත් තියෙනවා. මානසික අසනීපයකදි නම් පිළිගත හැකි දෙයක්, ඇත්තක් කොහෙත්ම කියවෙන්න විදියක් නෑ. ඇත්ත කියවෙනව නම් ඒක මානසික අසනීපයක් වෙන්නත් බෑ.


වරමින් කියන සාස්තරවලට පසුගිය දේවල් වගේම වර්තමාන දේවල් හරියට කියවුණත් ඉදිරිය ගැන කියන දේවල් සාර්ථකයි කියන්න බෑ. ප්‍රේතයින්ට අනාගතය ගැන කියන්න බෑ. ඒ වගේම තමයි සාස්තරය හරියට කියවුණත් කරන පිළියම්වල ඒ හැටි සාර්ථකත්වයක් තියෙනවා කියන්න බෑ. " පොල් ගෙඩි තුනක් ගහපන්....මේ බිත්තරය ගෙනිහින් කැරකෝප්පුවට දාහන්...මේක ගෙනිහින් පෑගෙන්න දාහන්..." කිව්වට ඒවායින් ප්‍රතිපලයක් ලැබෙන්න තියෙන ඉඩකඩ ඉතාම සීමිතයි. ඒත් යමක් හරියට කියවුණොත් එතැනින්ම යමක් කරන්නත් ගොඩක් දෙනෙක් පෙළඹෙනවා. 


කිසිම වරමක් නැති අයත් ඔය අතරෙ නැත්තෙ නෑ. බොරුව කියන දේ ඔනෑම ක්‍ෂේත්‍රයක තියෙනවා. සමහරු වෛද්‍යවරු විදියට පෙනී ඉන්නවා. සමහරු නීතිවේදීන් විදියට රඟපානවා. පොලිස් නිලධාරීන් විදියට පෙනී ඉන්න අයත් ඉන්නවා. ඒ ඉතින් මේ සමාජයෙ හැටි. 


ගුප්ත ලෝකය මහා සාගරය තරම් විශාලයි. ගොඩක් දෙනෙක් මේ දේවල් ගැන හොයන්නෙ අරමුණ ඔළුවෙ තියාගෙන නෙ. මේවා බොරු කියල ඔප්පු කරන්න ඕනැ කෙනා හොයන්නෙ බොරු කියල පෙන්නන්න පුළුවන් දේවල් විතරයි. මේවා ඇත්ත කියල පෙන්නන්න ඕනැ කෙනා හොයන්නෙ ඇත්ත කියල පෙන්නන්න පුළුවන් දේවල් විතරයි. මැදහත් තැනක ඉඳලා ගවේෂණය කරන අය අඩුයි. වසර ගණනාවක අත්දැකීම් තුළ සොයා දැනගත් දේ ඉතාම සරලව තමයි මේ ලිව්වෙ. අත්දුටු සිදුවීම් සියල්ල මේ විදියට ඉදිරිපත් කරන්න අමාරුයි. ප්‍රමාණය එතරම් විශාලයි.


සංජීව කුළුපන බණ්ඩාර 

077 7065760

071 8875816

Wednesday, June 2, 2021

 



කළුකුමාර දෝෂය පිළිබඳව බොහෝ දෙනා නොයෙක් අදහස් පල කරන බව පෙනෙන්නට තිබේ. ඇතැමුන් කළුකුමාර දෝෂය එක හෙළා බැහැර කරනු ලබන්නේ මෙය මානසික රෝගයක් බව පවසමිනි. 


මීට අවුරුදු සියයකට එකසිය පනහකට පෙරදී දෙවියන් හෝ යක්ෂ ප්‍රේතාදීන් සිටින්නේද යන කාරණය මෙතරම් ප්‍රශ්නකාරී නොවූ බව පැහැදිලිය. බටහිර දැනුම් පද්ධතිය තුලින් ලබන අධ්‍යාපනය තුළ ඇසට නොපෙනෙන සියලු දේ මිථ්‍යාවන් ලෙස බැහැර කරනු ලබයි. එවන් පසුබිමක් තුළ ඇතැම් බෞද්ධයෝ පවා දෙවියන් අමනුෂ්‍යයින් සිටිනවාද යන ප්‍රශ්නය මතු කරති. ජාත්‍යන්තර සංවිධාන විසින් සකස් කරනු ලබන විෂය නිර්දේශ අනුව ලබන දැනුම තුළ දෙවියන් අමනුෂ්‍යයින් ගැන පමණක් නොව අපගේ සැබෑ ඉතිහාසය පිලිබඳව වූවද නිවැරදි දැනුමක් නොලැබෙන බව පිළිගත යුතුය. 15 වැනි සියවසට පෙර බටහිරයින් යක්ෂයින් ආරූඩ වී ඇතැයි කියමින්  මානසික රෝගීන්ව මරාදමන කාලයේ පවා මෙරට මානසික රෝග සඳහා නිසි ප්‍රතිකර්ම භාවිතා කළ බවට සාක්ෂි පවතී. මානසික රෝග හා අමනුෂ්‍ය බලපෑම් වෙන් වෙන්ව හඳුනා ගත නොහැකි තරමට හෙළයෝ මෝඩයින් නොවූහ. 


 අචින්ත්‍ය වූ සත්ව විෂය තුළ ප්‍රේත,පිශාචාදී අමනුෂ්‍ය බලවේග අප්‍රමාණව සිටිති. සත්වයින් තම තමන්ගේ කර්ම ශක්තිය අනුව මනුෂ්‍ය, තිරිසන්,ප්‍රේත,අසුර, නිර,දිව්‍ය, බ්‍රහ්ම ආදී ලෝක වල උප්පත්තිය ලබයි. මනුෂ්‍යයින් හා තිරිසන් සතුන් අපට දර්ශනය වුණද ප්‍රේත, පිශාචාදී සත්වයින් දර්ශණය නොවෙයි.. ඒ ඔවුන් තන්මාත්‍රමය සූක්ෂම ශරීර වලින් යුක්ත වන නිසාය. අමනුෂ්‍යයින් දැක ගැනීමේ හැකියාවෙන් යුක්ත වූවෝ ද වෙති. ඇතැමුන්ට උපතින් එම ශක්තිය ලැබෙන අතර ඇතැමෙක් මානසික අභ්‍යාස මඟින් සිත සමාධි ගතකර එම ශක්තිය ලබාගනියි. දෙවියන් සහ යක්ෂ ප්‍රේතාදීන් සමඟ නොයෙක් ආකාරයෙන් ගණුදෙනු කරන්නෝද වෙති.


ජීවත්ව සිටියදී පුද්ගලයෙකු තුළ පවතින ප්‍රමුඛ ගති පැවතුම්, රුචි අරුචිකම් සංසාරිකව තමන් සමග බැඳී ගමන් කරයි. පාලනය කරගැනීමට නොහැකි තරමේ කාමාශාවන් සහිත පුද්ගලයින් සමාජය තුළ බහුලය. හය හතර නොතේරෙන කුඩා දැරියන් පවා දුෂණය කරන කාමුකයෝ සමාජය තුළ වෙති..තම ලෙයින් උපන් දියණියගෙන් පවා පහත් ආශාවන් සංසිඳුවා ගන්නෝ ද ඒ අතර වෙති..එක ගැහැණියකගෙන් සැහීමකට පත් නොවී වෙනත් කාන්තාවන් කරා යන ස්වාමිපුරුෂයින් ද වෙයි.. කාමයට දැඩිව ලොල් වූ මෙවැන්නෝ  මරණින් මතු ප්‍රේත ලෝකයේ උප්පත්තිය ලබන්නේ කාමුක ප්‍රේතයින් ලෙසය.මෙම කාමුක අමනුෂ්‍යයෝ කාන්තාවන් කෙරෙහි ප්‍රිය වෙති.  ඇතැම් අමනුෂ්‍යයෝ  කාන්තාවන් ස්පර්ශ කරති..කාන්තාවන් සමග සයනය කරති. කාන්තාවන්ගේ නොයෙක් අප ද්‍රව්‍ය කෙරෙහි ලොල් වූ අමනුෂ්‍යයෝ ද වෙති. මේ ආකාරයට කාන්තාවන් කෙරෙහි ලොල් වූ අමනුෂ්‍ය බලවේග හැඳින්වීම සඳහා පොදුවේ භාවිතා කරනු ලබන නාමය  "කළුකුමාරයා" ය.


කාමයට ලොල් වූ මෙම අමනුෂ්‍යයෝ සෑම කාන්තාවකටම බලපෑම් නොකරති. මොවුන් කාන්තාවකට සමීප වන්නේ ඇය වෙතින් මුදා හැරෙන සිතුවිළි හා හැඟීම් හරහාය. විවාහක කාන්තාවකගේ සැමියා විදේශ රටක සේවය කරනවා යැයි සිතමු. සැමියා සිහිවීමෙන් ඇය තුළ ඇතිවෙන ලිංගික හැඟීම්, කාමුක සිතුවිළි හා සම්බන්ධ වන අමනුෂ්‍යයා ඇය වෙත සමීප වෙයි. සමීපව පෙම්වතෙක් ඇසුරු කළ යුවතියක් ඔහුගෙන් දුරස් වී කල් ගෙවන විටද මෙවැනි අමනුෂ්‍යයින් සමීප වන බව පෙනෙන්නට තිබේ. කායික ඇසුර අවශ්‍ය නමුත් එය අහිමිව සිටින කාන්තාවන්ට, විවාහ වන වයස ඉක්මවා ගොස් සිටියද  විවාහ නොවී සිටින කාන්තාවන්ටද  මෙවැනි අමනුෂ්‍යන්ගේ බලපෑම් එල්ල වන අවස්ථා තිබේ..ඇතැමුන්ට මෙවැනි අමනුෂ්‍ය බලපෑම් හේතුවෙන් නොයෙක් රෝග පීඩාවන් ද ඇතිවෙයි. ශරීරය වැහැරීම, ප්‍රියමනාප පෙනුම වියැකී යාම, වරින්වර සුළු ක්ලාන්ත ගති ඇතිවීම, ආවේගශීලී ගති මතු වීම, උද්යෝගය අඩු වීම ආදී පීඩාවන් ද මේ අතර වෙයි.


නින්දේදී යමෙක් තමන් සමීපයේ සිටින බව, නින්දේදී යමෙක් තමන් සමඟ කායිකව එක් වන බව, යම් කිසිවෙක් ශරීරය මතට ගොඩවන ස්වභාවයක් දැනෙන බව ආදී නොයෙක් දැනීම් පිළිබඳව අසන්නට ලැබෙන අවස්ථා තිබේ. මෙරට පමණක් නොව එතෙර රටවල කල් ගෙවන ඇතැම් කාන්තාවෝද මෙවැනි ගැටළු ඉදිරිපත් කරති.


මිය ගිය ස්වාමි පුරුෂයා අමනුෂ්‍ය භවයක ඉපිද බිරිඳ වෙත සමීප වන අවස්ථා ද වෙයි. මිය ගිය පෙම්වතා අමනුෂ්‍ය භවයක ඉපිද පෙම්වතිය වෙත සමීප වන අවස්ථා ද නැතුවා නොවේ. මේ මාගේ මිය ගිය සැමියාය, මේ මාගේ පෙම්වතාය යනුවෙන් දැනගැනීමට හැකි වන අවස්ථා මෙන්ම නොහැකි වන අවස්ථාද වෙයි. එසේ දැනගැනීමට නොහැකි වූ අවස්ථාවකදී එය බැරවන්නේ ද කළුකුමාරයාගේ ගිණුමට ය. චිත්ත සමාධි බලය හිමි අධ්‍යාත්මවේදියෙකුට මේ කිනම් දෝෂයක් දැයි පැවසීම එතරම් අපහසු නොවේ.


අපගේ ඇසට නොපෙනෙන නමුත් මනුෂ්‍ය ශරීරය වටා රශ්මි මණ්ඩලයක් හෙවත් රැස් වළල්ලක් පවතී. මෙම රශ්මි මණ්ඩලය සිතේ ස්වභාවය අනුව පුද්ගලයාගෙන් පුද්ගලයාට වෙනස් වෙයි. සිත ප්‍රභාශ්වර වන විට ශරීර රශ්මිය දීප්තිමත්ව හා ශක්තිමත්ව පිහිටන නමුත් සිත දුර්වල නම් ශරීර රශ්මියද දුර්වලය. සිතෙහි නැඟෙන චේතනාවන් අනුව ද ශරීර රශ්මියේ පැහැය සහ ශක්තිය වෙනස් වෙයි. දුර්වල ශරීර රශ්මිය තුලින් අමනුෂ්‍යයින්ට සමීප වීමේ හැකියාව පවතී. 'කළුකුමාර දෝෂය' ලෙස හඳුන්වන අමනුෂ්‍ය බලපෑම් කාන්තාවකට සමීප වන්නේද මෙම දුර්වල ශරීර රශ්මිය හරහාය. ඇතැමුන්ගේ රශ්මි මණ්ඩලය ස්වභාවයෙන්ම දුර්වලය. අපලකාරී කාල සීමාවන් තුළ මුහුණ දීමට සිදුවන කරදර ගැහැට හේතුවෙන් ඇතිවන කළකිරීම් හෝ කෝපය නිසා ද රශ්මි මණ්ඩලය දුර්වල වෙයි. 


කළුකුමාර දෝෂය පමණක් නොව වෙනත් අමනුෂ්‍ය දෝෂ ද දුරු කරලීමේ හැකියාව මෛත්‍රී බලය සතුය. මෙත් වඩන පුද්ගලයාට අමනුෂ්‍ය උපද්‍රව ඇති නොවන අතර නිතර මෛත්‍රී වැඩීම අමනුෂ්‍යන්ගේ ප්‍රසාදයට ලක් වීමට හේතු වන බවද සත්‍යයකි. “අමුනුස්සානං පියෝ හොති” යන්නෙන් පැහැදිලි වන්නේ එයයි. නිතර මෙත් වඩන්නන්ගේ ශරීර රශ්මි මණ්ඩලය ප්‍රභාශ්වරය. මෛත්‍රී බලය හා සමාන කළ හැකි වෙනත් බලයක් නැත.


සංජීව කුළුපන බණ්ඩාර 

077 7065760

071 8875816




Monday, April 19, 2021

කලාවැව ගමන 2020.12.08

 



රටේ මොන විදියේ වාතාවරණයක් තිබුණත් මෙතැනට නම් යන්න වෙනාවම තමයි. ඒක නවත්වන්න බෑ. ගණුදෙනු කරන්නෙ දෙවිවරු දෙතුන් දෙනෙක් එක්ක විතරයි.  කඩවර කියන්නෙ ඒ දෙතුන් දෙනාගෙන් කෙනෙක්. ගණුදෙනු කරනවාය කියන්නෙ අදහනව කියන එක නෙමෙයි. ඒක වෙනම ගණුදෙනුවක්. දෙවියො ඇදහීමක්, දෙවියන්ගෙන් ඉල්ලීමක් නෑ. 


රන්වල දෙවියො හැරුණු කොට ඊළඟට සමීපම දෙවියො තමයි කඩවර කියන්නෙ. ගෞරවයට දෙවියො කියල කිව්වට කඩවර කියන්නෙ දෙවි කෙනෙකුත් නෙමෙයි. කඩවර යක්ෂයෙක්. නම සෙනෙවිරත්න. කඩවරලා ගොඩක් ඉන්නවා. කඩවර කියන්නෙ වාරි කර්මාන්තයට සම්බන්ධ තනතුරක්නෙ. සෙනෙවිරත්න මුල් කඩවර කියන්නෙ කඩවරලාගේ ප්‍රධානියා හින්දයි.


කඩවර එක්ක ගණුදෙනුව ආරම්භ වුණේ අහම්බෙන්. දවසක් නින්දෙදි කෙනෙක් කිව්වා කඩවර දෙවියන්ගෙ ප්‍රධාන දේවාලෙට ගිහින් එන්න කියලා. ටික දවසක් යන කොට ඒකට නිකම්ම අවස්ථාව උදා වුණා. ඒ ගිය පාර තමයි මේ නොනවත්වාම යන්නෙ. 


ඉස්සර ඉඳලම මම යක්කුන්ට ගරු කරනවා. ඒ හින්දම වෙන්න ඇති කඩවර එක්ක සම්බන්ධ වීමේ අවස්ථාව උදා වෙන්නත් ඇත්තෙ. මේ යක්කු කියන්නෙ ලේ බොන, මස් කන පජාත යක්කුන්ට නෙමෙයි. මේ සිංහල බිමේ ඉපදුණු, යක්ෂ වැඩ කරපු අපේ යක්කුන්ට. භරණ කියන්නෙත් මට නම් යකෙක්. අච්චර ලොකු ගලක් බුදු පිළිමයක් බවට පත් කරපු එක යක්ෂ වැඩක් නෙමෙයිද...කඩවර දේවාලෙට යන්න කලින් අවුකන පිළිමය ළඟට ගිහින් පිළිමය දිහා ටික වෙලාවක් බලාගෙන ඉඳලා, වැඳලා භරණටත් පින් දෙන්නෙ ඒ හින්දයි. කලාවැවේ නිර්මාණකරු විදියට සැළකෙන්නෙත් භරණ නේ. බුලතා කියන්නෙත් යකෙක්. ඔය විදියෙ යක්කු මොන තරම් නම් මේ හෙළ බිමේ ඉඳල තියෙනවද..අරහෙන් මෙහෙන් ඉංජිනේරුවො ගෙන්නගෙන අද කාලයේ හදන ජලාශවල හිටි ගමන් වතුර කාන්දු වෙනවා. අපේ යක්කු අවුරුදු දහස් ගාණකට ඉස්සර හදපු වැව් අදටත් හොඳට තියෙනවා.


කොහේ හරි ගිහින් ශාන්තිකර්මයක් කරනවා නම් කඩවරට ගොටුවක් දෙන්න අමතක කරන්නෙ නෑ. කඩවර එක්ක සම්බන්ධය පටන් ගන්න කලින් ඉඳලම ඒ වැඩේ කරනවා. කඩවරට ගොටුව දෙන්නෙ මට පිහිටක් ඉල්ලගන්න නෙමෙයි. හැකි නම් මෙන්න මේ බිමේ ජීවිතය ගෙවන අහිංසක මිනිස්සුන්ට පිහිටක් වෙන්න කියන එක තමයි එතැනදි කරන්නෙ. මගේ ප්‍රතිපත්ති තුළ දෙවියන්ගෙන්, යක්ෂයින්ගෙන්, ප්‍රේතයින්ගෙන් කිසිම ආකාරයේ පිහිටක් උපකාරයක් මට ඉල්ලන්න බෑ.


හෙළ බිමේ දෙවියන්ගේ බලයට වඩා යක්ෂයින්ගේ බලය වැඩියි. ඒ වුණාට අපේ යක්ෂයො ගැනවත් යක්ෂයින්ගේ බලය ගැනවත් දන්න අය අඩුයි. 


දෙවියො, යක්ෂයො, ප්‍රේතයො එක්ක ගණුදෙනු කරන්න භාෂාවක් අවශ්‍ය නෑ. ඒ අයත් එක්ක ගණුදෙනු කරන්න ඕනැ සිතුවිලිවලින් මිසක් වචනවලින් නෙමෙයි. සිතුවිලිවලින් ගණුදෙනු කරන්න නම් හොඳ චිත්ත සමාධියක් ඕනැ. චිත්ත සමාධිය ඇති කරගන්න එක තමයි ගොඩක් දෙනෙකුට තියෙන අමාරුම වැඩේ. අද කාලයේ ජ්‍යොතිෂ කටයුතු, දේව කටයුතු, මන්තර කටයුතුවල නියැලෙන ගොඩක් දෙනෙකුටත් චිත්ත සමාධියක් නෑ. වචනෙ වැරදුණු ගමන් කුණුහරපවලින් ප්‍රහාර එල්ල කරගන්න හැටි වගේම අනවශ්‍ය සිද්ධිවල පැටලෙන, අනුන්ට අපහාස කරන හැටි ගොඩක් දෙනෙක් දකිනවා ඇති. 



මම මීට අවුරුදු දහයකට විතර කලින් කඩවර ගැන පත්තරේකට ලිපියක් ලිව්වා. ඒ ලිපිය 2016 දි මගේ බ්ලොග් අඩවියෙ පල කළා. මේ ළඟදි මම දැක්කා ඒ ලිපිය තව කාගෙද පේජ් එකක තියෙනවා ලියපු කෙනාගේ නමවත් නැතුව. වැඩේ කියන්නේ...ඒ ලිපියෙ තියෙන දේවල් ගැන සමහරු අහල තියෙන ප්‍රශ්නවලටත් කිසිම ලැජ්ජාවක් නැතුව උත්තරත් දීලා. ඔන්න ඔය වගේ යක්කු තමයි දැන් ඉන්නේ.

ඒ ලිපිය කියවන්න මෙතනින්.    http://manthra-gurukam.blogspot.com/2016/03/blog-post.html



                                                            සංජීව කුළුපන බණ්ඩාර  

Sunday, August 23, 2020

බහිරව පූජාව.

 


             ප්‍රේත,පිශාච, කුම්භාණ්ඩාදී අමනුෂ්‍යයින් ගැන ලියැවුණු ලිපි අන්තර්ජාලය තුළ හා පොත් පත්වල සුලභව දකින්නට ලැබේ. බහිරවයින් ගැන හා බහිරව පූජාවන් ගැන ලියැවුණු ලිපි එතරම් සුලභ නොවේ. දැනට දකින්නට ලැබෙන ලිපි කීපය තුළ ද අන්තර්ගතව ඇත්තේ පොත් පත්වල සඳහන් වුණු තොරතුරු හෝ පාරම්පරිකව පැවත එන තොරතුරු ය. අවබෝධකරගත් කරුණු හෝ අත්දැකීම් තුළින් ලැබූ දැනුම එක් කොට ලියැවුණු ලිපියක් සොයාගැනීමට නැත.


               අෂ්ට බහිරවයින් ලෙස බහිරවයින් අට දෙනෙක් වේ යැයි විශ්වාසයක් පවතී. බහිරවයින් දස දෙනෙක් සිටින බවට ද මතයක් ඇත. බහිරවයින් 18 දෙනෙක් සිටින බව පවසන්නෝ ද වෙති.

අෂ්ට බහිරවයින් මෙසේ නම් කර තිබේ.

1 මහා බහිරව හෙවත් විද්‍යා රාජ 

2 සංහාර බහිරව හෙවත් කාමර රාජ 

3 අෂ්ටාංග බහිරව හෙවත් නාග රාජ 

4 රුරු බහිරව හෙවත් ස්වච්ඡන්ද රාජ 

5 කාල බහිරව හෙවත් විලම්භීත රාජ 

6 කෝධ බහිරව හෙවත් දේව රාජ 

7 කාල බහිරව හෙවත් උදාරාජ 

8 රුද්‍ර බහිරව හෙවත් විඝ්න රාජ 

         ආකාශ බහිරව හා පාතාල බහිරව යනුවෙන් තවත් දෙදෙනෙක් වේ යැයි ද කියැවේ. බහිරව නාම නොයෙක් තැන්වල විවිධ ආකාරයට සඳහන් වන බව ද දකින්නට ලැබේ. මෙම බහිරවයින්ට අධිපතිත්වය දරන්නේ ඊශ්වර දෙවියන් බවත්, බහිරව පූජාවට ප්‍රථමයෙන් ඊශ්වර දෙවියන් උදෙසා පූජාවක් පැවැත්විය යුතු බවටත් මතයක් පවතී. මෙම අෂ්ට බහිරව සංකල්පය කවදා කෙසේ නිර්මාණය වූවා දැයි යන්න ගැටළුවකි. 

        බහිරවයින් ලෙස හඳුන්වන අමනුෂ්‍ය කොට්ඨාශයක් භූමිය හා සම්බන්ධව වෙසෙන බව සත්‍යයකි. මොවුන් බහිරව ප්‍රේතයින් ලෙස හැඳින්වූව ද වරදක් නැත. බහිරව දෙවියන් හෙවත් භූමාටු දෙවියන් ලෙස හඳුන්වන දේව කොට්ඨාශයක් ද වෙයි. ඔවුන් පන්සල්, දේවාල ආදී පූජා භූමි, ශුද්ධ භූමි ආශ්‍රිතව වෙසෙන නමුත් සෙසු සාමාන්‍ය භූමි ඇසුරු නොකරයි. පන්සල්, දේවාල ආදියේ මූර්තිමත් කර තිබෙන්නේ ද බහිරව දේව රූප ය.

       නිදහන් කරන ලද වස්තූන් ආරක්ෂා කරන බහිරවයින් ද වෙයි.ඔවුන් තමන්ට පැවරී ඇති රාජකාරිය ඉටු කරමින් නිධානය ආරක්ෂා කරමින් සිටිනවා මිස වෙනත් කටයුතු කෙරෙහි අවධානය යොමු කරන්නේ නැත. නිදහන් ලබාගැනීමේදී පුද පූජා පවත්වන්නේ එම බහිරවයින්ට ය.

      සාමාන්‍ය ඉඩකඩම් ආශ්‍රිතව වෙසෙන්නේ බහිරව ප්‍රේතයින් ය. එනම්,භූමිය පිලිබඳ වූ දැඩි තෘෂ්ණාවෙන් මිය ගොස් බහිරව ප්‍රේතයින්ව ඉපිද භූමියෙහි රැඳී සිටින ප්‍රේතයින් ය. මොවුන් සුලභ ය. අවුරුදු දහස් ගණන් භූමිය ඇසුරු කරගෙන සිටියි.ඔවුන් එම ඉඩම් තුළම ජීවත් වූවන් ය. භූමිය කෙරෙහි වූ බලවත් තෘෂ්ණාව නිසාම භූමි ප්‍රේතයින් හෙවත් භූමාටු ප්‍රේතයින් ලෙස ප්‍රේත භවයේ උප්පත්තිය ලැබූවන් ය.

    ඔරලෝසුව තිබුණු තැනින් ගළවා වෙනත් බිත්තියක සවි කළ ද සිත සොයන්නේ ඔරලෝසුව පෙර තිබුණු තැනම ය. සිතට හුරු වූ දේ ටික කලකින් වෙනස් වූව ද සිතින් අල්ලා ගන්නා දේ අත හැරීම පහසු නොවේ. භූමිය කෙරෙහි තෘෂ්ණාව ඇතුව මියගිය පසුව එම භූමිය නැවත තමන් සතු කරගැනීමට පහසුම ක්‍රමය බහිරවයෙක්ව ඉපදීම ය. කුමන දේකට වූව ද තෘෂ්ණාව ඇති කරගැනීම දුකට හේතු වේ.
           
    භූමාටු ප්‍රේතයින් හෙවත් බහිරවයින් ගෙන් එල්ල වන අවහිර බාධක හඳුන්වන්නේ බහිරව දෝෂ ලෙස ය. බහිරව පූජා පවත්වන්නේ බහිරව දෝෂ දුරු කරගැනීමට ය. නව නිවසක් තැනීමේදී බහිරව පූජාවක් පවත්වන්නේ ඒ සඳහා ය. බහිරව දෝෂ පවතින භූමියක නිවසක් තැනීමේදී බාධක අවහිර එල්ල වේ. 'මේ මගේ ඉඩම, මට අයිති භූමිය' යන අදහසින් රැඳී සිටින බහිරවයින් වෙනත් අය එම භූමිය භාවිතා කිරීම සම්බන්ධයෙන් නොසතුටට පත් වේ. එවන් භූමියක වාසය කිරීමේදී ද ගැටළු,කරදර ඇති වේ. දියුණුවට බාධක එල්ල වේ. 

     තෘෂ්ණාවෙන් මියගොස් තෘෂ්ණාවෙන්ම භූමිය අරක්ගෙන සිටින්නේ නම් කළ යුත්තේ එම තෘෂ්ණාව සිඳලීම ය. තෘෂ්ණාව සිඳලීම කවි ගායනා, ස්තෝත්‍ර කියවීම්, නැටීම් ආදියෙන් කළ නොහැක. ඒවා ප්‍රදර්ශනාත්මක කටයුතු පමණි.

      තෘෂ්ණාව නැති කිරීමට නම් අවබෝධය ඇති කළ යුතුය. බහිරවයෙක්ව උපදින්නට හේතුව තෘෂ්ණාව බවත්, මෙසේ භූමිය අල්ලාගෙන බහිරවයෙක්ව කල් ගෙවීම දුකක් බවත්, තෘෂ්ණාව දුරු කර ගත නොහැකි වූවොත් තවත් දීර්ඝ කාලයක් භූමාටු ප්‍රේතයෙක්ව දුක් විඳීමට සිදුවන බවත් අවබෝධ කර දිය යුතුය.බහිරව පිදේනිය බහිරවයින් උදෙසා කැප කිරීමෙන් අනතුරුව මූලිකවම කළ යුතු කාර්යය එයයි. බෞද්ධ දර්ශනයට අනුකූල නිවැරදි ක්‍රමවේදය ද එයයි. බහිරවයින්ට පමණක් නොව ප්‍රේත පිශාච කුම්භාණ්ඩාදීන්ට වූවද මෙසේ සත්‍යය අවබෝධ කර දිය යුතුය. ඒ සඳහා සමාධි බලයක් තිබිය යුතුය. ප්‍රේතයින් දැඩිව දුක් විඳිමින් ඉඩකඩම්,ගේදොර මෙන්ම ඇතැම් අවස්ථාවල මනුෂ්‍යයින් පවා අත නොහැර අල්ලාගෙන සිටින්නේ එය දුකක් බව නොදන්නා නිසාය. එය අවබෝධ කර දීමට කිසිවෙක් ඉදිරිපත් නොවූවද ප්‍රේතයින් අල්ලා බෝතල්,කුප්පි ආදියේ සිර කිරීමට ඉදිරිපත් වන අය බොහෝ වෙති. ඒවා ප්‍රාථමික කටයුතු මිස විශ්ව නීතියට අනුකූල කටයුතු නොවේ.

          බහිරව පූජාවක් පැවැත්වීමෙන් නිවසට සෞභාග්‍යය උදා වන බවට මතයක් පවතී. එහි සත්‍යතාවයක් ද තිබේ.එය සත්‍යයක් වීමට නම් මා පෙර සඳහන් කළ පරිදි ඔවුන් බහිරවයින් බවට පත් වීමට හේතුවත් ඉන් මිදිය හැකි මගත් අවබෝධ කර දිය යුතුය. අවබෝධය ලත් තැන් පටන් ඔවුන්ගේ යම් ආශීර්වාදයක් හෝ සහයෝගයක් නිවැසියන්ට හිමි වීමට ඉඩ කඩ තිබේ. මන්ද,එතැන් පටන් ඔවුන්ගේ සිතුවිලි රටාව වෙනස් වන බැවිනි. වර්තමානයේ බොහෝ ඇදුරන් විසින් ස්තෝත්‍ර, මන්ත්‍ර ආදියට පමණක් මුල් තැන දෙමින් සිදු කරන පූජාවන් ගෙන් එවැනි ප්‍රතිඵලයක් අත් නොවේ. සම්ප්‍රදායට ගරු කරමින්, දොළ පිදේනි දී ස්තෝත්‍ර ගයා ඔවුන් ප්‍රසාදයට පත් කරමින්  පූජා කටයුතු ඉටු කළ යුතු නමුත් අවසානයේ ඔවුන්ට ලබා දිය යුතු අවබෝධය ලබාදීමට නොහැකි වේ නම් පූජාවෙන් ලැබෙන ප්‍රතිඵලයක් නැත.

              සංජීව කුළුපන බණ්ඩාර 

Sunday, March 29, 2020

කර්ණමුණ්ඩය





                              කර්ණමුණ්ඩය. ඒ වචනය අහලාවත් නැති අය ඕනැ තරම් ඉන්නවා. මෙය කියවන ඔබත් කර්ණමුණ්ඩය ගැන අසා නැතුව ඇති. ඇතැම් විට කර්ණමුණ්ඩයෙන් සාස්තරත් අසා ඇති. ඒත්, ඒ කර්ණමුන්ඩයෙන් පැවසූවක් බව නොදන්නවා විය හැකියි.

ආරම්භය කුමන කාලයක සිදු වූවා දැයි නිශ්චිතව සොයා ගැනීමට නොහැකි වූවත්, අමනුෂ්‍යයින් ගෙන් වැඩ ගැනීම, අමනුෂ්‍යයින් සමඟ සම්බන්ධතා පැවැත්වීම වසර දහස් ගණනක පටන් සිදුව තිබෙනවා. ඈත අතීතයේ තරමට නොවූවත් අදද ඇතැමුන් අමනුෂ්‍යයින්ගේ උපකාර ලබාගන්නවා. ඒ සඳහා භාවිතා කළ යුතු නිසි ගුප්ත ශාස්ත්‍රීය ක්‍රම වේද මේ වන විට සුරැකිව ඇත්තේ සුළු පිරිසක් අත පමණයි.

කර්ණමුණ්ඩය කියන්නෙත් ප්‍රේතයෙක් බන්ධනය කරගෙන සාස්තර එහෙමත් නැත්නම් පේන කීමේ ක්‍රමයක්.  මෙය ඥාති වරමින් සාස්තර කීමේදී මෙන් ශරියට ගන්නා අමනුෂ්‍ය බලපෑමක් නොවෙයි.   සාස්තරය අසන්නට පැමිණි පුද්ගලයාට පැවසිය යුතු දේ කර්ණමුණ්ඩ ප්‍රේතයා විසින් සාස්තර කියන තැනැත්තාගේ කනට කර කියනවා. එවිට සාස්තරකරු ඒ සියල්ල සාස්තරය අසන්නට පැමිණි පුද්ගලයාට පවසනවා.ප්‍රේතයා කණට ඇසෙන්නට කතා කරන බැවින් කර්ණමුණ්ඩය නමින් හඳුන්වනවා. ඇතැම් ප්‍රදේශවල මෙය ප්‍රේතමාකාලි බන්ධනය ලෙස ද හඳුන්වනවා.

අනුන්ට සාස්තර කීමට නොව තමන්ට අවැසි යම් යම් කරුණු කාරණා දැනගැනීම සඳහා කර්ණමුණ්ඩය භාවිතා කරන අයද නැතුවා නොවෙයි.  ඇසුරු කරන අය , තමන් වෙත පැමිණෙන අය ගැන මෙන්ම නුදුරේදී සිදු විය හැකි කරදර විපත් ගැන පවා කර්ණමුණ්ඩයෙන් අසාගැනීමට පුළුවන්.

කර්ණමුණ්ඩය ගුප්ත විද්‍යාවේ බන්ධන කාණ්ඩයට අයත් ක්‍රමවේදයක්. බන්ධන කාණ්ඩයේ කටයුතු සිදු කිරීමේදී ස්වකීය ආරක්ෂාව සලසා ගැනීමට හැකි විය යුතුයි. යක්ෂ,ප්‍රේතාදීන් බන්ධනය කර ගැනීමේදී නොසිතූ විපත් කරදරවලට මුහුණ පෑමට සිදු විය හැකියි. ආරක්ෂක ගුරුකම් පිලිබඳ දැනුමින් තොර අය මෙවැනි කටයුතු අත්හදා බැලීමට යාම අවදානම් බව මතක තබා ගත යුතුයි. අමනුෂ්‍යයින් සමඟ සම්බන්ධ වීමේදී යහපත් චිත්ත සමාධියක් පවත්වා ගැනීමද ඉතාමත් වැදගත් වෙනවා.

ප්‍රේතයෙකු තමන් වෙත ගෙන්වා ගැනීමට ප්‍රේත තටුවක් පිළියෙළ කළ යුතුයි. ඊට ආහාර පාන, සුරා, පුළුටු, ගොඩ දිය මස්,විළඳ,කැවිලි, බත් ගොටු ආදිය අවශ්‍ය වෙනවා. මෙය ගුරු උපදේශ අනුව සිදු කිරීම වඩාත් ප්‍රතිඵලදායක වෙනවා. කාර්යය සඳහා යොදාගන්නා ස්ථානය අනුව තටුවට යොදා ගත යුතු පිදවිලි වෙනස් වෙනවා. බන්ධනය කරගන්නා ප්‍රේතයා රඳවා ගැනීමට පියන වැසිය හැකි කුඩා හෙප්පුවක් අවශ්‍ය වෙනවා. ගැට හතක් ගසාගත් හත් පටක් සහිත නූලක්, පුවක් මලක්, දුම්මල, දුම් කබලක් ආදියද සූදානම් කර ගත යුතුයි.

නූලේ එක් කොනක් තටුවෙහි ගැට ගැසා අනිත් කොන අතින් අල්ලාගෙන දුම්මල දුම් දෙමින් මැතිරිය යුතුයි. මේ සඳහා යොදා ගත හැකි දිෂ්ටි මන්ත්‍ර කීපයක් යකැඳුරන් සතුව පවතිනවා. මැතිරිමේදී ප්‍රේතයා පැමිණි බව දැනගැනීමට හැකි සංඥා ගැන අවබෝධයක් මාන්ත්‍රිකයා සතු විය යුතුයි. මෙහිදී ප්‍රේතයා පැමිණි බව ඇඟවෙන මූලික සංඥාව නම් අල්ලාගෙන සිටින නූල වෙව්ලීමයි. මනා චිත්ත සමාධියකින් යුතු ඇදුරෙකුට ප්‍රේතයා ළඟා වන විටම එය දැනගැනීමේ හැකියාව පවතිනවා. අත්දැකීම් විරහිත ආධුනික අයෙක් නම් මේ අවස්ථාවේදී බියට පත් වීමට ඉඩ තිබෙනවා.

ප්‍රේතයා නූලට පැමිණි බව දැනගත් විට බන්ධන මන්ත්‍රයෙන් හත් වර මතුරා නූල ඇද ගැට හත හිර කළ යුතුයි. සූදානම් කරගත් හෙප්පුවට දමා සුරැකිව තබාගන්නේ ප්‍රේතයා හිර වුණු මෙම නූලයි. සාස්තරයක් අසාගැනීමට අවශ්‍ය වූ විට හෙප්පුව විවෘත කර අදාල මන්ත්‍රයෙන් හත්වර මතුරා දුම් අල්ලා නැවත හෙප්පුව වසා ශරීරයට ස්පර්ශ වන සේ තබා ගත යුතුයි.

මේ,ප්‍රේත බන්ධනය සඳහා භාවිතා කළ හැකි කෙටි දිෂ්ටි මන්තරයකි.

ඕං ඉන්ද්‍රකාම ප්‍රේත වර වර භූත ප්‍රේත වර වර අට කොන සොළොස් කොන ප්‍රේත වර වර  ශ්‍රී විෂ්ණු නාරායන අණින් උන් විමානෙන් සලිතකර කකුසඳ කෝණාගම කාශ්‍යප ගෞතම සතර බුදුවරයින්ගේ අණින් ප්‍රේත යක්ෂයා යක්ෂණී ඉගිල ඉගිල දිෂ්ටි දිෂ්ටි වර වර නමඃ 

ප්‍රේත බන්ධන මන්ත්‍රය 


ඕං අරිත්තුන්ඩ දේවි කුරු කුරු ලාඩි පේසු ලංකාපුර හර හර එර්දි වා වා සෙල්ලුම් කට්ටු අංජන හනුමා දේවි කට්ටු හර්ලාඩි දැඩිමුන්ඩ දේවා කට්ටු ගුරුවාල නාරයනේ කට්ටු සර්ව විෂ්ණු දේව කට්ටු සෙල්ලුම් පූට්ටු පූට්ටු ප්‍රේත යක්ෂයා යක්ෂනී බුද්ධ බෝධි අණින් ධම්මරත්නේ අණින් සංඝරත්නේ අණින් තිරත්නේ අණින් කට්ටු කට්ටු පූට්ටු පූට්ටු සංගිලි පූට්ටු නමඃ 


ප්‍රේතයෙක් බන්ධනය කර තබා ගත යුත්තේ සීමිත කාල සීමාවකට පමණයි. නිශ්චිත කාල සීමාව ඉක්මවා යා නොදී ප්‍රේතයා නිදහස් කිරීමට වග බලා ගත යුතුයි.  එසේ කළද මෙය විශ්ව ධර්මතාවයට පටහැනි ක්‍රියාවකි. එනම් පාප කර්මයකි. යමෙක් වහළෙක් ලෙස තබාගැනීම හෝ සත්වයෙක් හිර කර තබාගැනීම වැනි ක්‍රියාවකි. ඵල විපාක මේ භවයේ නොවේ නම් මතු භවයකදී හෝ ලැබෙන බව අවබෝධ කර ගත යුතුයි. තමන් මිය යාමට පෙර ප්‍රේතයා නිදහස් නොකළොත් බොහෝ කාලයක් සිරවී සිටීමට ප්‍රේතයාට සිදුවේ.

           සංජීව කුළුපන බණ්ඩාර 



Thursday, October 24, 2019

දේපළ තණ්හාවෙන් නිවෙසට රිංගූ මළ යක්‍ෂණිය.


අපි, ඔහු අමිල යනුවෙනුත් ඇය දේවිකා යනුවෙනුත් හඳුන්වමු. අමිල තම බිරිඳ වූ දේවිකා සහ දියණියන් දෙදෙනා සමඟ අගනුවර ආසන්නයේ නිවෙසක පදිංචියට පැමිණියේය. ඒ, තම වැඩිමල් දියණියගේ පාසල් ගමන පහසු කරලීම සඳහාය. තම වැඩිමහල් දියණිය ශිෂ්‍යත්ව විභාගයෙන් ඉහළින් සමත් වූ බැවින් අගනුවර පිහිටි ප්‍රධාන පෙළේ බාලිකා විද්‍යාලයක අධ්‍යාපනය ලැබීමට භාග්‍යය හිමිවිය. දුර බැහැර සිට අගනුවර පාසලකට පැමිණීම දුෂ්ඛර බැවින් අමිල අගනුවර ආසන්න ප්‍රදේශයක නිවසක් මිලදී ගත්තේය. දේවිකාගේ මවද තම නිවස වෙත ගෙන්වා ගත්තේ වැඩ කටයුතු පහසු කරගැනීම සඳහාය.

අමිල ව්‍යාපාරිකයෙකි. මගී ප්‍රවාහන බස් රථයක හා වෑන් රථ කීපයක හිමිකරුවෙකි. ඊට අමතරව මුදල් පොලියට දීමේ ව්‍යාපාරයක්ද කරගෙන ගියේය. සමාජශීලී පුද්ගලයෙකු වූ අමිල අසල්වාසීන්ගේ සිත් දිනාගනිමින් තම බිරිඳ, දියණියන් දෙදෙනා හා නැන්දනිය සමඟ නව නිවහනේ සතුටින් කාලය ගතකළේය. වැඩිමහල් දියණිය තම අධ්‍යාපන කටයුතු ඉතාමත් සාර්ථකව කරගෙන ගියාය. බාල දියණිය පෙර පාසල් අධ්‍යාපනය ලැබුවාය.

දිනක් අමිලගේ බාල දියණිය තමන් මුහුණ දෙමින් සිටි කරදරකාරී සිදුවීමක් ගැන තම සමඟ පැවසුවාය.

" මා දිහා යකෙක් බලාගෙන ඉන්නවා අම්මේ...ගේ ඇතුළෙ තනියම ඉන්න වෙලාවටත් බලාගෙන ඉන්නවා...මිදුලෙ සෙල්ලම් කරන කොටත් බලාගෙන ඉන්නවා..."

දියණියගේ ප්‍රකාශයෙන් දේවිකා තරමක් තැති ගත්තාය. එහෙත් ඒ වගක් දියණියට පෙන්වූවේ නැත.

"බයවෙන්නෙ නැතුව ඉන්නකො...අපි තාත්තා ආවම කියමු...මිදුලෙ තනියම සෙල්ලම් කරන්නෙ නැතුව ඉන්නකො මීට පස්සෙ.."

දේවිකා දියණියගේ සිත සැනසුවාය.පසුව, දියණිය තමන් සමඟ පැවසූ දේ තම මව සමඟ පැවසුවාය.

" ඒ මොකක්ද ඒ කතාවෙ තේරුම...? මේ ළමයා කවදාවත් ඔය වගේ දෙයක් කියල නැහැනෙ...පුතා ආවම කතාකරගෙන හෙට උදේම අවිස්සාවේල්ලට ගිහින් දරුවගේ හඳහන බලාගත්තොත් හොඳයි වගේ..."

අමිල තම ව්‍යාපාර කටයුතු අහවර කර නිවසට පැමිණි විගස දේවිකා දියණිය පැවසූ සියල්ල අමිලට කීවාය.

" හිතේ ඇඳිච්චි මොකක් හරි වෙන්න ඇති...කාටුන් බලන එකනෙ කරන්නෙ...ඕවයෙ තියෙන දේවල් තමයි ඔය පේනවා ඇත්තෙ...කලබල නොවී බලමුකෝ ටිකක්..."

අමිල එසේ පවසා බිරිඳගේ බිය සැක තුරන් කළේය. සමහරවිට එහෙම වෙන්නත් පුළුවන් යැයි ඇයට ද සිතුණි.

 දිනක් දේවිකා පෙර පාසලට ගොස් දියණියද රැගෙන නිවසට පැමිණ තම උදව් වීම පිණිස මුළුතැන්ගෙයට ගියාය. දියණිය සාලයට වී විස්කෝතු කමින් රූපවාහිනිය නරඹමින් සිටියාය. මුළුතැන්ගෙයි ආහාර පිළියෙළ කරන අතරවාරයේ තම දියණිය කෙරෙහි වරින්වර අවදානය යොමු කිරීමට දේවිකා අමතක කළේ නැත. බල්ලෙකු බුරාගෙන පනින ශබ්දය ද සමඟ දියණිය කෑගසන ශබ්දයෙන් කලබලයට පත්වුණු දේවිකාත් මවත් සාලයට දිව ආවාය. " මොකද වුණේ..." යැයි අසමින් දේවිකා දියණිය ඔසවාගෙන මිදුලට බැස්සාය. දියණියගේ මුහුණ තුවාල වී ලේ ගලමින් තිබුණි. අසල්වැසි නිවසකට කතාකොට ත්‍රීවීලරයක් ගෙන්වා ගත් දේවිකා මවද නංවාගෙන දියණිය රෝහල වෙත රැගෙන ගියාය. දියණියගේ මුහුණ සපා කා තිබුණේ බල්ලෙකි. ඒ. දේවිකාලාගේ නිවසට නිතර එන යන අසල්වැසි නිවසක බලු සුරතලෙකි.

එදින රාත්‍රිය තුවාල ලත් සිඟිත්තියට පමණක් නොව පවුලේ සියලු දෙනාටම මහත් වේදනාබර රාත්‍රියක් විය. " හෙටම ගිහින් දුවගෙ හඳහන බලාගන්න ඕනැ...ගෙදර ගැන ඔයාගෙ අවදානය දැන් හරිම අඩුයි...කොච්චර වාහන තිබුණත් හදිස්සියකට ගෙදර වාහනයක් නෑ...බිස්නස් පස්සෙම යන්නෙ නැතුව ගෙදර ගැනත් ටිකක් හොයල බලන්න..."

බිරිඳගේ කතාවට අමිල පිළිතුරු දීමට ගියේ නැත. පසු දිනට තිබුණු වැඩ කටයුතුද නවතා දමා දියණියගේ හඳහන බලාගැනීමට යාම සඳහා යොදා ගත්තේය.

පසුදා උදෑසන අමිල සහ දේවිකා නිවෙසින් පිටත් විය. දියණිය බලාගැනීම සඳහා මව නිවසෙහි නතර වූවාය.

අමිල සහ දේවිකා යනු මේ ජ්‍යොතිර්වේදියාට අමුත්තන් දෙදෙනෙක් නොවේ. අමිල සහ දේවිකාගේ විවාහ මංගල්‍යය සඳහා වූ නක්ෂත්‍ර පත්‍රය පිළියෙළ කරන ලද්දේ ද මේ ජ්‍යොතිර්වේදියාය. ඒ මීට වසර පහළොවකට පමණ ඉහතදී ය. එදා මෙදාතුර සෑම සුවිශේෂ කටයුත්තකදීම අමිල සහ දේවිකාගේ ජ්‍යොතිෂ උපදේශකවරයා වූයේ මොහුය. ආගිය තොරතුරු කතා කිරීමෙන් අනතුරුව දේවිකා තම දියණියගේ ජන්ම පත්‍රය ජ්‍යොතිර්වේදියාට පිළිගැන්වූවාය. ජන්ම පත්‍රයක් පරීක්ෂා කිරීමේදී තත්කාල ශාස්ත්‍රය ද ඊට අදාල කරගැනීම මේ ජ්‍යොතිර්වේදියාගේ සිරිතකි. දශා, අන්තර් දශා ගණනය කර, තත්කාල කේන්ද්‍ර සටහනද සකසා ගත් ජ්‍යොතිර්වේදියා පලාපල විස්තරය කියන්නට විය.

" දරුවාට සෙනසුරුගේ ඒරාෂ්ටක අපලයකුත් තියෙනවා...දැනට පදිංචි වෙලා ඉන්න තැනත් දෝෂයක් තියෙනවා...ඉන්න ඉඩමෙ තියෙන්නෙ තදබල අමනුෂ්‍ය බලපෑමක්...ඒ වගේ දෝෂ බලපාන්නෙත් අපල තියෙන අයටනේ...ඒරාෂ්ටක අපල තියෙන තව කෙනෙක් ගෙදර ඉන්නවා...එයත් පරිස්සම් වෙන්න ඕනෑ...ඉඩමෙ තියෙන අමනුෂ්‍ය දෝෂය ඉක්මනින් අයින් කරගන්න ඕනැ...ගෙදර හැමෝගෙම හඳහන් බලාගන්න එක තමයි හොඳ...මොකද අපල තියෙන අය පරිස්සම් වෙන්න ඕනැ...අපල දුරුවෙන්න පිළිවෙත් කරගන්න ඕනැ..."

ජ්‍යොතිර්වේදියා පැවසූ කරුණු කාරණාවලට සාවදානව සවන්දීගෙන සිටි දේවිකා කටහඬ අවදි කළාය.

" අපේ හැමදේකටම වෙලාවල් බැලුවෙ, නැකත් හැදුවෙ ඔබතුමානෙ...ඒත්, වෙලාව කියන්නෙ...අලුත් ගේ ගන්න කලින්වත්, ගෙදරට ගෙවදින්න කලින්වත් ඔබතුමාව මුණගැහෙන්න වෙලාවක් ලැබුණෙ නෑ...හැමදෙයක්ම කලබලේටනෙ කරන්න වුණේ...හදිස්සියට ලඟපාත කෙනෙක්ගෙන් නැකතක් අරගෙන තමයි ගෙදරට ගියේ...ෆෝන් එකෙන් කතා කරලවත් වෙලාවක් අහගන්න ඕනැ කියලා හිතාගෙන හිටියත් එහෙමවත් කරගන්න හම්බවුණේ නෑ...මොනව කරන්නද...අපේ වෙලාව තමයි..."

සියලු විස්තර තොරතුරු අසා දැනගත් අමිල සහ දේවිකා ජ්‍යොතිෂවේදියාගෙන් සමුගත්තේ පවුලේ සෙසු ජන්ම පත්‍රද රැගෙන නැවත පැමිණීමේ බලාපොරොත්තුවෙනි.

දින කීපයකින් දියණිය සම්පූර්ණයෙන් සුවය ලැබුවාය. අමිල සුපුරුදු පරිදි ව්‍යාපාරික කටයුතු කරගෙන ගියේය. සියලු දේ අමතකව ගියා සේ සියල්ලෝ පෙර පරිදි කාලය ගත කළෝය. ඒ, තදබල අමනුෂ්‍ය දෝෂ පවතින ස්ථානවල කටයුතු සිදුවන ආකාරයයි.

දිනක් අමිල මැදියම් රාත්‍රියේ නින්දෙන් අවදි වූයේ බස් රථය නවතා තිබුණු දෙසින් ඇසුණු ශබ්දයක් හේතුවෙනි. අමිල ඇඳෙන් බැස දොර විවෘත කරන හඬ ඇසී බිරිඳ දේවිකාද අවදි වූවාය.

" කොහෙද මේ මහ රෑ දුවන්නෙ...? "
කුමක් සිදුවන්නේ දැයි සිතාගත නොහැකිව දේවිකා එසේ ඇසුවාය

" බස් එක පැත්තෙන් සද්දයක් ඇහුණා...මම බලලා එන්නම්..."

අමිල එසේ කියාගෙන, විදුලි පන්දමද දල්වාගෙන බස් රථය පැත්තට දිව ගියේය. දේවිකා දොර අසලට වී බලාගෙන සිටියාය. බස් රථය දෙසට දිව ගිය අමිල ආපසු පැමිණෙන පාටක් නැත. විදුලි පන්දමේ එළියද නොපෙනේ. දේවිකා ගෙතුළට ගොස් මව නිදා සිටි කාමරයට ඇතුල්වී ඇය අවදි කළාය.

" අම්මෙ...ඉක්මනට නැගිටින්නකො...සද්දයක් ඇහුණ කියල අමිල බස් එක පැත්තට ගියා..."

දේවිකා මවද කැටුව බස් රථය දෙසට ගියාය. අමිල පෙනෙන්නට නැත. බස් රථයේ ඉදිරි දොර විවෘතව තිබෙනු දුටු දේවිකා බස් රථයට ගොඩවූවාය.

" අම්මේ......................"

දේවිකාගේ හඬින් මව පමණක් නොව යාබද නිවැසියන් ද කලබලයට පත්විය. අමිල බස් රථය තුළ වැටී සිටියේය. අසල්වැසියන් පැමිණ රෝහල වෙත ගෙන ගියද ඒ වන විටත් අමිල මෙලොව හැර ගොස් තිබුණි. වෛද්‍යවරුන්ගේ නිගමනය වූයේ අමිල හදිසි හෘදයාබාධයක් හේතුවෙන් මියගොස් ඇති බවයි.

සිදුවූයේ කුමක් දැයි කිසිවෙකුටත් සිතාගත නොහැකි විය. දේවිකා තම ආදරණීය සැමියාගේ අවමංගල්‍ය කටයුතු ඉටු කර හත් දවසේ දානමය පුණ්‍ය කර්මයද සිදුකොට, දරු දෙදෙනාත් මවත් සමඟ ගොස් තම ජ්‍යොතිර්වේදියා හමුවූවාය. තම මියගිය ස්වාමි පුරුෂයාගේ ජන්ම පත්‍රයද ඇතුළුව පවුලේ සියලු දෙනාගේ ජන්ම පත්‍ර ජ්‍යොතිර්වේදියා වෙත පිළිගන්වමින්, පසුගිය කාලයේ සිදු වුණු අවාසනාවන්ත සිදුවීම් ගැනද සැල කළාය.

" ඒරාෂ්ටක අපල තියෙන තව කෙනෙක් ඇති කියලා කලින් වතාවෙ දුවගෙ හදහන බලපු වෙලාවෙ මම කිව්වනේ...තදබල ඒරාෂ්ටක අපලයක්නෙ තිබිල තියෙන්නේ...ඒරාෂ්ටක අපලයි, අමනුෂ්‍ය දෝෂයි තියෙන වෙලාවට ඉතින් කරන්න තියෙන දේවල් මොන විදියකින් හරි මඟහැරෙනවා...දැන් ඉතින් තුන් මාසයක් ගත වෙනකල් ඔය විදියට ඉඳලා...තුන් මාසෙ දානෙත් දීලා ඔය අමනුෂ්‍ය දෝෂය අයින් කරමු...පොඩි දුව තනි කරන්නෙ නැතුව හොඳට බලාගන්න...අනිත් දුවට නං අපල බලපෑම් නෑ...ඉඩමෙ ඉන්නෙ මළ යක්ෂණියක්...ඔය ඉඩමෙ මුල් පදිංචිකාරියක්...දේපළවලට තණ්හාවෙන් මැරිලා මළ යක්ෂණියක් වෙලා ඉඩමට වෙලා ඉන්නවා...පදිංචියට එන අයට කරදර කරනවා..."

අමිලගේ තුන් මාසයේ දානමය පින්කම අහවර වී දින කීපයකින් දේවිකා තම ජ්‍යොතිර්වේදියාගේ උපදෙස් අනුව අමනුෂ්‍ය දෝෂය ඉවත් කරගැනීමේ කටයුත්ත ඉටු කරගත්තාය. 

අමිලගේ සියලු ව්‍යාපාර තම සොහොයුරන් දෙදෙනාගේ සහය ඇතුව දේවිකා විසින් අඛණ්ඩව පවත්වාගෙන ගියාය. කෙසේ වෙතත් තම ආදරණීය සැමියාගේ වියෝවෙන් දේවිකාගේ ජීවිතය තුළ ඇතිවූ හිඩැස මෙන්ම, ආදරණීය පියා අහිමි වීම හේතුවෙන් දියණියන් දෙදෙනාගේ සිත්වල ඇතිවූ දුක තවමත් නොනැසී පවතියි.

( මෙය සත්‍ය සිදුවීමකි. නම් ගම් පමණක් මනඃකල්පිත බව සළකන්න)

ජ්‍යොතිෂවේදී, ගුප්ත වෛද්‍ය
සංජීව කුළුපන බණ්ඩාර
(2019.10.20 මව්රට පුවත්පත)
.

Friday, June 7, 2019

කල් පවතින අසනීප සහ අමනුෂ්‍ය බලපෑම්.


ලෙඩදුක් කාටත් පොදුයි. වයසට යාම සහ මරණය වගේම ලෙඩ වීමත් සියලු සත්වයින්ට පොදු ධර්මතාවයක්. කැස්සක් හැම්බිරිස්සාවක් හෝ නොවැළඳුණු කෙනෙක් හොයගන්න නෑ. ඒත් සමහර අසනීප හරිම සංකීර්ණයි. මොන තරම් වෛද්‍යවරු හමුවෙලා ප්‍රතිකාර ගත්තත් සුවය ලැබීම තබා අසනීපය නිවැරදිව සොයා ගැනීමට පවා නොහැකි වන අවස්ථා උදා වෙනවා. සමහරු අවුරුදු ගණන් ලෙඩ ඇඳේ දුක් විඳිනවා. ගස් ගල් වගේ හොඳට ශක්තිමත්ව ඉන්න සමහරු නොසිතූ විදියට ලෙඩ ඇඳට වැටෙනවා. ගණන් ගන්නෙවත් නැති තරමේ පුංචි තුවාලයක් ජීවිතයම අහිමි කරන තත්වයට පත්වෙන අවස්ථා ගැන අහන්න ලැබෙනවා. මොන තරම් වේදනාවක් පීඩාවක් දැනුණත් වෛද්‍යවරුන්ට අසනීපයක් ගැන මොනවත්ම හොයාගන්න බැරි වෙන අවස්ථා තියෙනවා. දවල් කාලයේ හොඳට ඉන්නවා රෑට තමයි හොඳටම අමාරු වෙන්නේ... ගෙදරදි අසාධ්‍යයි ඒත් ගෙදරින් පිට වුණාම තරමක සුවයක් දැනෙනවා... ගිය වතාවෙ වෛද්‍ය වාර්තා හොඳයි ඒත් මේ පාර වාර්තා එච්චර හොඳ නෑ... ඔපරේෂන් දෙකක්ම කළා දැන් තුන්වැනි එකත් කරන්න හදන්නේ... වෛද්‍යවරු කියන්නෙ විශ්වාසයක් තියන්න බෑ කියලා... කකුලේ කොටසක් කැපුවා දැන් ආයෙත් ඊට උඩින් කපන්න ඕනැලු..... මොන තරම් නම් දෙනෙක් ඔය විදියේ කතා කියනවද.
නොයෙක් හේතු හින්දා අසනීප වැළඳෙනවා. විෂබීජ,මත්ද්‍රව්‍ය, වැරදි ආහාර රටා, වස විෂ ශරීරගත වීම්, මානසික පීඩා, අනතුරු ආදී නොයෙක්  කාරණා රෝගාබාධ ඇතිවීමට බලපානවා. ඒ වගේම රෝගාබාධවලට අමනුෂ්‍ය බලපෑම් හේතු වන අවස්ථාත් තියෙනවා.

 යක්ෂ,ප්‍රේත,පිශාච,කුම්බාන්ඩ කියන කොටස් හතර තමයි අමනුෂ්‍යයින් විදියට හඳුන්වන්නේ.  මේ අමනුෂ්‍යයින්  වර්ග 4 කට බෙදා දක්වලා තියෙනව මෙන්න මේ විදියට.
1. නිජ්ඣාමතණ්හික - ගින්නෙන් දවනු ලබන බිල සහිත ගසක්‌ මෙන් ශරීරය ඇතුළත ක්‌ෂුධා ගින්නෙන් ඇවිලෙන ප්‍රේතයින්.
2. කුප්පිපාසික - බොහෝ කාලයක්‌ කෑම බීම නැතිව සා පිපාසා දෙකින් පීඩිතව සිටින බුප්පිපාසික ප්‍රේතයින්.
3. පංසුපිසාචික - වමනය, සෙම්සොටු, සැරව, ගැබ්මල ආදිය ආහාරයට ගන්නා ප්‍රේතයින්.
4. පරදත්තූපජීවි - ඥාතීන් විසින් දෙනු ලබන පිනෙන් ජීවත්වන ප්‍රේතයින්.
මෙයින් පංසුපිසාචික ප්‍රේත කොට්ටාශය තමයි මනුෂ්‍යයින් ගේ ශරීරයේ ඇතිවෙන නොයෙක් අසනීප සමග සම්බන්ධ වෙන්නේ.

ශරීර අභ්‍යන්තරයේ තිබෙන නොයෙක් අවයවවලට විෂ බීජ ඇතුළු වෙලා රෝගී වූවන් ගැන නොයෙක් විට අහන්නට ලැබෙනවා. " විෂ බීජයක් ගිහින්ලු....අයි සී  යූ එකේ ඉන්නෙ..." ඔහොම කියන අය මොන තරම් අපිට මුණගැහෙනවද. ලෙඩේ හොයලා හොයලා අවසාන මොහොතෙදි දැනගන්න ලැබෙනවා විෂ බීජයක් ඇතුළු වෙලා කියලා. මේ වගේ දේවල් අමනුෂ්‍ය බලපෑම් හින්දා සිද්ද වෙන්නත් පුළුවන්. අමනුෂ්‍ය බලවේගයක් ශරීරගතව ක්‍රියාත්මක වීමේදී  වයිරසයක්, බැක්ටීරියාවක් හෝ විෂ බීජයක් හේතුවෙන් ඇතිවෙන සංකූලතාවන්ට සමාන සංකූලතා ඇතිවෙන්න පුළුවන්.

අමනුෂ්‍ය බලපෑම් හේතුවෙන් රෝගී වුණු ඇතැමුන් අවුරුදු ගණන් ලෙඩ ඇඳේ කල්ගෙවනවා. කාලයක් බටහිර වෛද්‍ය ප්‍රතිකාර ලබාගෙන සුවයක් නැතුව ආයුර්වේද ප්‍රතිකාරවලට මාරු වෙනවා. ආයුර්වේද ප්‍රතිකාරවලින් සුවයක් නැතුව හෝමියෝපති ප්‍රතිකාරවලට යොමු වෙනවා. ඔය ආකාරයට හැකි සෑම ක්‍රමයකින්ම සුවයක් ලබාගන්න උත්සාහ කළත් ප්‍රතිපලයක් නැති වෙනවා. එවැනි රෝගීන් ගණනාවක් මා බේරාගෙන තියෙනවා. එවැනි ඇතැමුන් යළි කිසි දිනෙක සුවයක් නොලැබෙනු ඇතැයි සිතා සිටි බවත් සඳහන් කළ යුතුයි.

අමනුෂ්‍ය බලපෑම් හේතුවෙන් රෝග කීපයක් එක වර ඇතිවෙන අවස්ථාත් තිබෙනවා. එවිට වෛද්‍ය ප්‍රතිකාර ලබාගැනීමේදී දැඩි දුෂ්කරතා ඇතිවෙනවා. එක් අසනීපයකට ලබාදෙන ඖෂධ හේතුවෙන් තවත් අසනීපයක් උත්සන්න වීමට ඉඩ තිබෙනවා. මෙවන් අවස්ථාවල දී වෛද්‍යවරු පවා අසීරුතාවයට පත් වෙනවා. එවැනි ගුප්ත තත්වයන් ඇති කරන අමනුෂ්‍ය බලපෑම් ඉවත් කළ පසුව වෛද්‍යවරු පවා මවිතයට පත් කරමින් සියලු අසනීප සුව අතට හැරෙනවා.

ඇතැමුන්ගේ අසනීප පීඩාවන් නිවසින් බැහැරට ගිය විට සුව වෙනවා. නැවත නිවසට පැමිණි පසුව අසනීප මතුවෙනවා. වාසය කරන ස්ථානයේ පවතින අමනුෂ්‍ය  බලපෑම් හේතුවෙන් එවැනි තත්වයන් ඇතිවෙනවා. ස්ථානගතව පවතින අමනුෂ්‍ය බලපෑම් ඉවත් කළ පසුව අසනීප පීඩා දුරු වෙනවා.

ඇතැමුන්ට නොයෙක් අපහසුතා, පීඩාවන් දැනෙන නමුත් පවතින අසනීපය කුමක්දැයි වෛද්‍යවරුන්ට සොයාගන්න අපහසු වෙනවා. එවැනි අය මානසික වෛද්‍යවරු වෙත යොමු කරවන අවස්ථාත් තියෙනවා. මානසික වෛද්‍යවරුන්ටත් කිසිම අබාධයක් සොයාගන්න අපහසු වෙනවා. ඔය විදියේ තේරුම් ගත නොහැකි ගුප්ත පීඩාවන් ඇතිකරන අමනුෂ්‍ය බලපෑම් එල්ල වෙන අවස්ථා තියෙනවා.

රෝගියාගේ අවසන් සුසුම් පොද වා තලයට මුසු වීමට ඔන්න මෙන්න කියා තිබිය දී ගුප්ත වෙදදුරෙක් හමුවට යාම ප්‍රතිපලදායක නොවිය හැකි බව ද සඳහන් කළ යුතුයි. රෝගියා අන්තිම අසාධ්‍ය තත්වයට පත් වීමට පෙර ගුප්ත වෙදැදුරෙකු හමුවීම වඩාත් වැදගත් වෙනවා. ඇතැමුන් රෝගියාගේ කලදසාව බලාගැනීමට පැමිණෙන්නේ රෝගියා පසුදා තෙක් හෝ ජීවත් වේ දැයි විශ්වාසයක් තැබිය නොහැකි අවස්ථාවලදී වීම කණගාටුවට කාරණයක්.

ශරීරගතව හෝ ස්ථානගතව හිඳිමින් පීඩාවන් එල්ල කරන අමනුෂ්‍යයින් ඉවත් කළ යුතු වෙන්නේ කොහොමද ? අමනුෂ්‍යයින් ගැටගසා බෝතල් කුප්පි තුළ සිර කළ යුතු ද ? ඒ සම්බන්ධයෙන් නැවත කතා කරමු.

ජ්‍යොතිෂවේදී, ගුප්ත වෛද්‍ය 

   සංජීව කුළුපන බණ්ඩාර.